MAMLAKA YA BANDARI (TPA) KANDA YA ZIWA YAAGIZWA KUKAMILISHA UKARABATI WA GATI MAGARINI

Imewekwa : September 25th, 2023

• Waziri Mkuu wa Jamhuri ya Muungano wa Tanzania Mhe. Kassim Majaliwa ameiagiza Mamlaka ya Bandari Kanda ya Ziwa Kukamilisha ukarabati  wa Gati lililopo katika mwalo wa Magarini Kata ya Nyakabango Wilayani Muleba ili liweze kuendelea kutumiwa na wananchi.
  

Akizungumza katika ziara hiyo alipotembelea na kukagua shughuli zinazofanyika katika   Mwalo huo Waziri Mkuu amesema kuwa kukamilika kwa Gati litawasaidia wananchi kuendesha vyema shughuli zao za uvuvi, kurahisisha shughuli za usafirishaji  pamoja na kuwasaidia wajasiriamali wadogo wadogo kujiingizia kipato.

"Walipokuwa wamejenga mala ya kwanza walikuwa wamekadilia kidogo maji yalikuwa yanafunika hili Gati na kwa hiyo mvua zikiwa nyingi tutashindwa kusafiri kutoka hapa Magarini kwenda kwenye visiwa vingine na kwahiyo natoa maelekezo Mamlaka ya Bandari watenge fedha haraka waje hapa wamalize kujenga eneo hili" amesema Mhe. Kassim Majaliwa.

Lakini pia ameiagiza Halmashauri kwa kushirikiana na Mamlaka ya Bandari kukaa kikao cha pamoja kujadili na kuweka bei sawa katika maeneo ya kuhifadhia mizigo ili  kuweza kuwaondolea changamoto wananchi ya kushindwa kuamua ni wapi wanaweza kuhifadhi mizigo yao pamoja na kuisaidia Halmashauri na Mamlaka ya Bandari kuingiza Mapato yanayotokana na Maghala ya kuhifadhia mizigo.

Sambamba na hayo ameagiza kuongezwa kituo cha TANAPA katika mwalo wa Magarini ili hata watalii wanaoenda Kutalii Katika hifadhi ya Rubondo waweze kupita katika Bandari ya Magarini ambapo amemuagiza kamishna wa ardhi Mkoa kwa kushirikiana na Halmashauri wafike eneo la Magarini na kukagua eneo hilo na fursa zake ili kuweza kupata eneo la kuweka kituo cha TANAPA.